مسرحية بلدنا واة يابلدنا

بلدنا واة يا بلدنا(انقذو المريس من التهجير) اس او اس s.o.s
فجأة تقرر الحكومة المصرية بقرار 264 نزع ملكية 500 فدان من اجود الاراضى الزراعية وقد اصدر القرار الباطش رئيس الوزراء ووزير التنمية المحلية فى 7 فبراير 2007 بتحويل شاطىء النيل فى بلدنا المريس الى مرسى للمراكب السياحية وكذالك انشاء قرية سياحية


اتذكر الان يوسف شاهين وعبد الرحمن الشرقاوى ومحمود المليجى فى فيلم الارض (الارض لو عطشانا نرويها بدمانا عهد وعلينا امانة)
الثورة المجيدة قامت واعطت هذة الاراضى للفلاحين لما كان الملك فاروق ملك اتى عبد الناصر واعاد الارض لاصحابها
والان:
تم ضم قرية المريس التى تتبع جغرافيا وسياسيا الى محافظة قنا مركز ارمنت الى مدينة الاقصر



الفصل الاول

الناس بدأت فى الاعتراض (احنا مش ضد انشاء ميناء للمراكب )
_ انتوا يا مخاليق مش وش نعمة والفقر ليكم حشمة
_يا سيادة الجبار الطاغية العظيم نحن نجلك ونهابك ونخشاك سبحانك
احنا مش ضد انشاء المراسى السياحية
_ اومال اعتراضكم على اية ايها الكلاب الجرابيع؟
_نحن نشكر احسان معاليك وفخامتكم لوصفنا بالكلاب والجرابيع

فهذا فضل من مولانا الطاغية العظيم اسكنه الله فسيح جناتة
_ الموضوع ببساطة ان الناس فى بلدنا طماعة وجشعة وشوية صعايدة

لابسين جلاليب ومتخلفين حضاريا لا يرقوا الى مستوى جلالتكم فى التفكيير والتدبير والتعمير
_الناس يا مولانا المبجل والمهيب اعتادو على الفقر والجهل والتخلف
ودى امراض مزمنة والعلاج منها احيانا مستحيل
_طيب انا المولى العظيم الجبار القهار المرعب قررت ان انشأ الموانى

والقرية السياحية وسأجعل منهم نسخة طبق الاصل من تماثيل الخدم

وسوف اصل الى مسعاى هذا عن طريق الخطة الاتية
_تفضل يا مولانا المخطط المتوحش الرهيب
_اسمعوا منى ما وصلت له ذاتى وافكارى التى لا تقبل القسمة على اتنين والتى تكفر بالحكمة وتقدس الذات


_نحن نعشقك اكثر ايها المولى العظيم عندما تسهب وتطنب فى ذكر اوصافك وفى اثناءك على نفسك
ولكننا نحن ايضا من رعيتك الحقيرة التى ترغب ايضا فى الثناء عليك

والتقرب اليك ايها الجبار المؤذى دائما _

فنحن نستأذنك فى ان تترك لنا الحق فى مديحك والثناء عليك
_لكم هذا ايها الملاعين الوضعاء....يا اولاد النعجة السوداء
_هل يتفضل مولانا الجبار المرعب فى بث افكارة العظيمة لعبيدة الارقاء

_سوف اقضى تماما على هولاء الشراذم وسوف اجعل منهم عبرة لمن يعتبر.-

مولانا المرعب نرجوا الا تختلط عليك الاوراق ويقوم رجالك الاشداء بخلط الحابل بالنابل
__ايها الاوغاد ماذا تقصدون؟

نقصد ان الا تختلط عليهم الامور لنقص المعلومات لديهم فيقضوا

علينا نحن وانت تعرف من نحن ايها المخيف
_طبعا لن تختلط عليهم الامور فهم اهل خبرة وهذة ليست اول مرة يقومون بهذا

وانتم من الاقطاب العارفين لماضيهم الدنيء والوضيع وبما انكم من الوضعاء

فانتم تعرفون جيدا الفرق ما بين الحق والباطل

وبما اننى اشدكم بأسا ووضاعة وخسة تمكنت من السيطرة عليكم وعليهم ايها الاخساء الاوباش
_نشكر مولانا اعزة الله واذلنا – نشكر الظروف التى جعلت منك يا سيدى دائم السخط علينا

فسامحنا وارحم بنا وازد من سخطك وغضبك علينا نظل دائما عبيدك الاوفياء

اجعنا يا سيدى اكثر فانت تعرف ان المعدة بيت الداء وان الجوع كافر
طلع دين ابونا نكون اكثر خوفا وجبنا
_جميل جميل
_اتعرف يا سيدى ان احنا كلاب وشوية رعاع
ونتشرف ان ان تكون لنا قدوة بصراحة لم نرى احط منك ولا اشرس منك

,اجتمعت فيك يا سيدى كل الصفات الحقيرة والنبيلة
فانت جبان وشرس ابيض الوجة واسود القلب ذكى جدا واكثرنا غباءا ما انبالك وما واوضعك

–انت مفيش منك اتنين ولا ف الصين
_اعرف هذا جيدا
-اذن اثلج صدورنا السوداء افضحنا فى بيوتنا يا فضاح يا كريم- ابن سوءاتنا واقطع الاشجار

__ لقد قررننا نحن انا: ان اصب عليهم لعناتى بأن اقضى على جهلهم فأجعلهم اكثر جهلا وان اقضى على فقرهم
_وتجعلهم اكثر فقرا

- واية كمان ايها السيد العار ياما فى الجراب ايها الحاوى الخسيس
- سوف اشترى منهم ارضهم بتراب الفلوس سوف اشتت شملهم

واجعل منهم نسخة طبق الاصل منكم ايها الوضعاء الاخساء
وما عليكم الا ان ان تفتنوا بينهم فالفتنة اشد من القتل يا اوغاد
_نعم الرأى يا ابا الحكم فيتفرقوا بين القرى والنجوع بلا وطن
_اما اذا علت اصواتهم يوما ما نستغلهم اسوأ استغلال

ونبى لهم متحفا يحفظ تاريخهم ويجعلهم عبرة لمن يفكر ان يعترض او يثور فى هذا البلد
_ سحقا لك ولافكارك اللعينة يا سيدى اللعين هكذا يكون الظلم وهكذا تؤكد يا سيدى ان للفراعين لعنة

-سأجعل منهم تراثا لن يبقى منهم الا بعض الاغانى والمواويل
_القصب القصب والقصب عاوز المية يا واد
_قوللى يا قوللى كسرنى وكسر قوللى
والواد الليبى حضر جابلوا مسجل واتكسر
لن يبقى منهم غير اغانيهم الحزينة وارواحهم المنكسرة
_الحريم مش حتبطل عديد بس حتى العديد قوربوا ينسوة من يوم ما دخل التلفزيون

والشيخ ربيع مات وعلى ابو حسن بطل يغنى ومكارم مات ولطيفة كبرت
_يا محمد يا محمد الحاج شوقى مات الحاج شوقى مات
محمد_
لا حول ولا قوة الا بالله ابو منصور مستحملش
من يوم ما سمع ان بيته حيتهد والمستودع هيتشال
عوض_لا يا راجل قول كلام غير كدة انا نعرف

انة عيان من بدرى الغرض اللى حصل حصل امر اللهض
ناصر_عارف يا عم عوض انا من كتر السفر مرة فى اسوان

ومرة فى القاهرة ومر ة برة مصر كنت دايما بحس بغربة فى اى مكان غير بلدنا المريس

فى القاهرة مثلا ملايين بشر وتمشى فيها من اولها لاخرها مفيش حد عارفك تمشيها شارع شارع

ولا حد عارفك ولايسأل فيك احساس صعب يا ابو الزناتى
عوض ابو السيد:طبعا ياوردى انت فى المريس معظم الناس عرفاك

ولو مش عارفاك عارفة اخوانك الصغير قبل الكبير مثلا انا ساعات بتلخبط بينك وبين اخوك احمد
بس القطعية والملامح واحدة انتم عيال منصور وجدكم يوسف وعمامك ناس طيبين الله يرحمهم
_ناصر:الله يرحم الجميع
عوض ابو السيد:بس انا والله خايف على الشيخ النوبى من الموضوع دة

ابوك يا وردى ياما خدم البلد ابوك يا وردى ما يستحملش _جدك يوسف بنى الجامع والديوان
وابوك وعمامك اتبرعوا بأرض المستشفى الارض دى كانت جنينة مليانة نخل وتين ومنجة وعنب
ناصر؛ يا عمى عوض اللى عند ربنا ميضيعش
بس لما تتبرع لله ولو حتى بالبيت مفيش عندينا مانع

لكن ان احنا نطرد من بيوتنا واراضينا بالذوق او العافية سواء رضينا او مرضيناش
عوض ابوالسيد : كلام ولا ف الحواديت يا وردى انا من ساعة متولدت فى المريس

وعمرى فى يوم مفكرت انى حعيش او ادفن براها
ابو الزرقا:يا ابو الزناتى زمان كنا ندفن فى جبانة ارمنت الحيط

دلوقتى لما يا ياخدوا الخربان والارض ويدوكم بيوت وارض فى جبل المريس

او الحورجة حتبقى الجبانة جنب البيت والناس متتمشورش من المريس لأرمنت الحيط

او الجنازة تطلع من البحر للجبل ويطلع تلاتة ميتين الناس فوق الجرارات وفى التيوتات والعرابى الكبوت
حمايد:والله الحكومة باين عليها عاوزة تريحنا وتريح الناس يعنى لما يدونا بيوت ف الجبل

او الحرجة حتبقى الجبانة جنب البيت
ابو الزرقا: طاب مين قلك بعد ما يشيلونا من بيوتنا هيلا بيلا زى بالات مصنع سكر ارمنت

وزى الكرس بتاع البهايم ويجيبوا القالابات ويرمونا فى الجبل

طاب اية اللى ضمنا بكرة لما يلاقى شوية اثار ويروحوا يهجرونا تانى
خلى بالك يا استاذ ناصر انت سيد العارفين ان اللى حصل للقرنة ممكن يحصل لينا

وتتقلب الدنيا علينا ويجى الراجل ابو مناخير زى البغبغان ويجيب القنوات الفضائية

السى ان ان ويقرر انه صاحب الكشف الاثرى

ويعمل معسكر حولينا ويبدا مسلسل التهجير التانى بحجة الصالح العام

وبأسم المحافظة على الحضارة الانسانية من الضياع
ناصر: شىء مزرى ومؤلم امبارح وانا معدى من القرنة صعبت على بيوت الناس

البيوت كانت جميلة وانيقة وكان منظرها جميل جدا مع الجبل نسيج واحد

الناس كانت عايشة فى امان والجبل كان متونس بيهم وبحكاويهم لكن حسبنا الله ونعم الوكيل

..عارفين كان معايا اصحاب اجانب كل سنة يجوا مصر ويعشقوا الناس فى مصر قبل الأثار

لما شافوا البيوت المهدودة زعلوا جدا وفيهم سيدة جاتها هسترية

وصرخت بالصوت الحيانى وقالتلى دة مش ممكن اللى بيحصل فى بلدكم دة ..حرام والله حرام
احنا بنحب بلدكم ودة عمل غير انسانى..هما لية فى بلدكم بيخلوا الناس تكرة الاجانب والسياح

..البيوت والمسيح كانت اجمل البيوت يعنى تواصل ما بين زمان والحاضر

وبعدين مهى نفس البيوت اللى كان عايش فيها المصريين زمان

بيوت من الطين بيوت من نفس لون الناس بيوت شبهم وشبه المكان وراحت الست تبكى وتتحسر وتلعن
حمايد: معقولة الكلام دة؟
ناصر: الناس دول بيحبوا يشوفوا الناس والاماكن اللى مش شبههم يؤمنوا ان الاختلاف رحمة

بيحبوا اللون بتاعنا بيحبوا لون الطين انتوا عارفين ان اسم مصر فى كل اللغات مشتق من طمى النيل
الزناتى: اومال لية عاوزين يطينوها علينا و يعملوا خليج نعمة تانى وقرية سياحية فى بلدنا

مادام الضيوف اللى جايين بلادنا بيحبونا
زى ماحنا اقدة
ابو الزرقا: يا بهيم انت مسمعتش عن سيدك الجولف دة ملا البلد من سيناء لغاية لوكسر
حمايد: مدد مدد مدد ...ايوة انا عارفوا قوى قوى صغطرون

ومن ضربة واحدة يتنطط زى العفاريت لغاية ميوقع فى خرمة وفتحة فى الارض
ابو الزرقا: اصل سيدك الجولفى من العالم السفلى ولما ينشل على حد لازم ياخدوا معاة للأرض!

اغنية

بين الصواب والصح مفيش غلط عقلى خلاص منى شرد
ادور ع اللى باقى منى وسط صخر اشقة ينقسم لالف صخر
ادور ع اللى باقى منى وسط بحر واضرب بدرعاتى واعوم اعوم لاى شط
يجذبنى خوفى لتحت واصرخ عليك يا وطن بين الحياة والغرق
من بوعد الصدى وطرش الودان تمرر حلاوة الروح يتحرر غريق مجنون


الفصل الاول من مسرحية (بلدنا واة يا بلدنا) بقلم سكان قرية المريس المسرحية من ناصر النوبى
والان ادعوكم لكتابة الفصل التانى لانى مش مقتنع بالممثليين والمخرج غبى جدا! بس بصراحة انا مقتنع جدا بالكومبارس
اولاد بلد ! فهيا نكتب مسرحية سوا
انا بكرة العمل الفردى علشان كدة انا اسست فرقة جميزة من 3 سنين واكتشفت ان احنا شعب فكة من اول فلنكة حتى اخر فلنكة من اسوان حتى اسكندرية بمعنى ان العمل الجماعى فى مصر فاشل جدا لذالك ان متعاطف جدا مع شخصية الطاغية الجبار القهار علشان كدة توقفت عن كتابة المسرحية للأبد.

ناصر النوبى